Сучасныя падыходы ў практыцы выкладання беларускай мовы
Ніякае багацце людзей
не бывае даражэйшым
за іх родную мову
Я.Колас
19 лютага на базе ДУА «Гімназія № 3 г. Брэста» прайшоў раённы семінар для настаўнікаў I-II класаў Ленінскага раёна г. Брэста па тэме: «Сістэма работы настаўнікаў беларускай мовы па развіцці вуснай і пісьмовай мовы вучняў у I і II класах».
Пачала семінар намеснік дырэктара па вучэбнай рабоце Кінчак Л.А., якая расказала аб вучэбна-метадычным аб'яднанні настаўнікаў пачатковых класаў, пазнаёміла з асаблівасцямі адукацыйнага працэсу ў пачатковай школе гімназіі. Педагогі гімназіі Міхалюк Г.А. і Якаўчыц А.А. дзяліліся вопытам работы па тэмах: «Метады і прыёмы фарміравання маўленчых уменняў і навыкаў, якія забяспечваюць разуменне вуснага і пісьмовага маўлення. Развіццё вучняў ва ўмовах вывучэння дзвюх блізкароднасных моў» і «Адзінства ўрочнай і пазаўрочнай работы як найважнейшая ўмова фарміравання маўленча-камунікатыўных навыкаў».
«Мова продкаў маіх і нашчадкаў маіх – беларуская родная мова» пад такім дэвізам прайшло творчае выступленне вучняў пачатковых класаў. Гасцям былі прапанаваны вершы беларускіх аўтараў, выступленне харавога калектыву 4-га класа. І апошнім акордам стаў паказ спектакля “Як заяц варыць піва” (паводле У.Караткевіча).
Настаўнікі пачатковых класаў Ленінскага раёна г. Брэста з карысцю і задавальненнем правялі час у гімназіі.
